’மிடில் கிளாஸ்’ திரைப்பட விமர்சனம்!

சென்னை:

முனீஷ்காந்த் விஜயலட்சுமி காளி வெங்கட், ராதாரவி, குரேஷி, மாளவிகா அவினாஷ், கோடங்கி வடிவேலு மற்றும் வேல.ராமமூர்த்தி ஆகியோர் முக்கிய கதாபாத்திரங்களில் நடித்துள்ள படம்தான் “மிடில் கிளாஸ்”

இப்படத்தின் கதையைப் பொருத்தவரையில்,

ஒவ்வொரு நடுத்தரக் குடும்பத்தில் ஏற்படும் பிரச்சனைகள் அனைத்துக்கும் பொருளாதாரம் பற்றாக்குறையே மிக முக்கியமான காரணமாக இருக்கும் என்பதை மையமாக வைத்து வெளி வந்திருக்கும் படம் “மிடில் கிளாஸ்”

சென்னையில் வசிக்கும் நடுத்தர குடும்பத் தலைவர் முனீஸ்காந்த். அவரின் மனைவி விஜயலட்சுமியின் நீண்ட நாள் கனவு என்னவென்றால் எப்படியாவது ஒரு சொந்த வீடு வாங்க வேண்டும் என்ற ஆர்வத்தில் இருக்கிறார். ஒரு நடுத்தரக் குடும்ப ஆண்களுக்கு எப்போதும் பணம் ஒரு பெரிய பிரச்சினையாகத்தான் இருக்கும். அதிலும் ஆடம்பரவாழ்க்கைக்கு அல்லது மற்றவர் பெருமைக்கு வாழவேண்டும் என்று ஆசைப்படுகிற மனைவி அமைந்துவிட்டால் அவன் அனுபவிக்கும் வேதனை சொல்ல முடியாது. அப்படிப்பட்ட நடுத்தரக் குடும்ப வாழ்க்கையில் சிக்கி தவிக்கும் முனீஷ்காந்த் – விஜயலட்சுமி தம்பதிக்கு, தங்களது பொருளாதார பிரச்சனைகளில் இருந்து மீள்வதற்கான ஒரு வாய்ப்பு கிடைக்கிறது. அதாவது தனது இறந்து போன தனது அப்பாவின் பழைய பெட்டியில் இருந்து பத்திரம் ஒன்றை எடுக்கிறார்.

அதில் பல வருடங்களுக்கு முன்பு, ஒருவரிடம் அவரது கடையை இலவசமாக கொடுத்திருந்த பத்திரம் அது. அந்த பத்திரத்தை எடுத்துக் கொண்டு அந்த நபரிடம் முனீஷ் காந்த் சென்றபோது அவரது தந்தை தனக்கு ஒரு குரு போலவும் பெரிய உதவிகள் செய்து,தன்னை வாழ வைத்தவர் என்று கூறினார், அப்போது இருந்த கடை தற்போது பல கோடி மதிப்புள்ளதாக இருக்கின்ற நிலையில், அந்த நபர் தனக்கு கடை கொடுத்த முதலாளியின் மகன் என்பதால் ஒரு கோடி ரூபாய்க்கான காசோலை ஒன்றை முனீஷ் காந்திடம் கொடுக்கிறார். இதனால் மகிழ்ச்சியில் என்ன செய்வது என்று புரியாமல்  ஆளாளுக்கு கனவு காண்கிறார்கள்.  இந்நிலையில், அந்த காசோலையை வங்கியில் செலுத்த முயலும் போது பெயர் எழுதாத அந்த  காசோலையை தொலைத்து விடுகிறார் முனீஷ்காந்த்.  இதனால் குடும்பமே அதிர்ச்சியில் ஆழ்கிறது. தொலைந்த தொகையை முனீஸ் காந்த் கண்டுபிடிக்க போராடுகிறார். இறுதியில் முனீஸ் காந்த்திற்கு  தொலைந்து போன காசோலை கிடைத்ததா? இல்லையா? என்பதுதான் ‘மிடில் கிளாஸ்” படத்தின் மீதிக் கதை.

காமெடி,  குணசித்திர வேடங்களில் நடித்துக் கொண்டிருந்த முனீஸ்காந்த் முதன் முறையாக இப்படத்தில் கதையின் நாயகனாக நடித்திருக்கிறார். ஒரு மிடில் கிளாஸ் குடும்பஸ்தன் என்ன மாதிரியான சவால்களை சமாளிப்பார் என்பதை வெளிச்சமாக திரையில் கொண்டு வந்து மிக அருமையாக நடித்திருக்கிறார். வீட்டைவிட்டு மனைவி விரட்டும்போது அவர் படுகின்ற அவஸ்தையும் துயரமும் கவலையும்  போன்ற நடிப்பில் முனிஷ்காந்த் அசத்தி இருக்கிறார்.

முனீஷ்காந்தின் மனைவியாக நடித்திருக்கும் விஜயலட்சுமி, நடுத்தரக் குடும்ப பெண்களின் மனநிலையை பிரதிபலிக்கும் வகையில் சிறப்பாக அனைவரும் ரசிக்கும் விதத்தில்  மிரட்டலாக நடித்திருக்கிறார். 

மேலும் படத்தில் நடித்த, காளி வெங்கட், கோடாங்கி வடிவேலு, குரேஷி, ராதாரவி, வேலா ராமமூர்த்தி என படத்தில் நடித்த அனைவரும் தங்களுக்கு கொடுத்த கதாபாத்திரத்தை உணர்ந்து சிறப்பாக செய்து இருக்கிறார்கள்.

பிரணவ் முனிராஜின் இசையில் பாடல்கள் கேட்கும் ரகம்தான். பின்னணி இசையில் இந்த கதைக்கு தகுந்தவாறு கதாபாத்திரங்களின் உணர்வுகளையும் வெளிப்படுத்தியிருக்கிறார்.

ஒளிப்பதிவாளர் சுதர்ஷன் ஸ்ரீனிவாசனின் ஒளிப்பதிவில் நடுத்தரக் குடும்ப வாழ்க்கையை தத்ரூபமாக படமாக்கி இருப்பது பாராட்டுக்குரியது.

கதை, எழுதி இயக்கியிருக்கும் கிஷோர் முத்துராமலிங்கம், நடுத்தரக் குடும்ப வாழ்க்கையை மையமாக வைத்து இயக்கி இருந்தாலும், குடும்ப கஷ்ட நஷ்டங்களை மிகை இல்லாமல் சொல்லி மனதில் இடம் பிடிக்கிறார்.

மொத்தத்தில், ‘மிடில் கிளாஸ்’ குடும்ப படம்.

ரேட்டிங் 3/5.

RADHAPANDIAN.