‘லவ் ஓ லவ் ‘ – திரைப்பட விமர்சனம்!

சென்னை:

பவிஷ் , நாக துர்கா, கே எஸ் ரவிக்குமார், ஆதித்யா கதிர், செல்வராகவன், வனிதா விஜயகுமார் மற்றும் பலர் நடித்துள்ள படம்தான் “லவ் ஓ லவ்’. இப்படத்தை  மகேஷ் ராஜேந்திரன் கதை, எழுதி இயக்கி இருக்கிறார்.

இப்படத்தின் கதையைப் பொருத்தவரையில்,

தனுஷின் சகோதரி மகனான பவிஷ் தனது தந்தை கே.எஸ் ரவிக்குமார் சொல்லுக்கு கட்டுப்பட்டு மாதம் 40 ஆயிரம் சம்பளத்தில் பணிபுரிந்து வருகிறார்.  இந்த சூழலில் கே.எஸ் ரவிக்குமார் தனது மகன் பவிஷிடம் எந்த காரணத்தை கொண்டும் யாரிடமும் கடன் வாங்க கூடாது அது ஒரு கேன்சர் நோய் மாதிரி என்று அறிவுரை கூறுகிறார். இதனால் பவிஷ் தனது தந்தையின் இருசக்கர வாகனமான டிவிஎஸ் வண்டியில் தனது அலுவலகத்திற்கு சென்று வருகிறார். 40 ஆயிரம் சம்பளம் என்றாலும் அதை தன் தந்தையிடம் கொடுத்துவிட்டு பெற்றோரின் அன்புக்கு கட்டுப்பட்டு வாழ்கிறார் பவிஷ். இந்த சமயத்தில் நாக துர்கா என்ற பெண்ணைக் கண்டதும்  காதலில் விழுகிறார் பவிஷ். ஆனால் ஒரு கட்டத்தில் அவர் காதலில் விழுந்ததால் தான் வாங்கும் சம்பளத்தை விட அதிகமாக வெளியே பல கந்து வட்டிகாரர்களிடம் கடன் வாங்கி காதலிக்கு அளவுக்கு மீது செலவு செய்கிறார்.

இந்த சூழலில் பல்வேறு விதத்தில் பவிஷிற்கு கடன்கள் அதிகமாகி விட்டதால் புதிதாக வாங்கிய அவரது மோட்டார் சைக்கிளை அடியாட்கள் பறித்துக் கொண்டு செல்கின்றனர்.அதே போல் கடன் கொடுத்தவர்கள் அவரது வீட்டிற்கு வந்து பவிஷையும், தந்தை கே.எஸ் ரவிகுமாரையும் அவமானப்படுத்தி அனைவரது முன்னிலையில் கேவலப்படுத்துகிறார்கள். கடன் வாங்கிய பணத்தை  திருப்பிச் செலுத்த முடியாமல் தவிக்கிறார் பவிஷ். இந்த சூழலில் அவரது காதலி நாகதுர்காவுக்கு அளவுக்கு மீறி செலவு செய்த காரணத்தால் தன் காதலை தியாகம் செய்து விட முடிவு செய்கிறார் பவிஷ். இந்த சூழலில் அவரது காதலி நாகதுர்கா,  பவிஷ்தான் தனக்கு ஏற்றவர் என்ற முடிவில், அவரை மணந்தே தீர வேண்டும் என்பதில் உறுதியாக இருக்கிறார். இதனை ஏற்றுக் கொள்ளாத பவிஷ் நாக துர்வாவின் விருப்பத்தை நிறைவேற்ற ஒரு நிபந்தனை விதிக்கிறார்.

அந்த  நிபந்தனையை ஏற்றுக் கொண்ட நாக துர்கா ‘இனிமேல் நீ எனக்காக எதற்கும் செலவு செய்ய வேண்டாம்.  நானே உனக்கு வேண்டிய செலவுகள் செய்கிறேன்’  என்று கூறி அவர் பவிஷ் வாங்கிய கடன்காரார்களுக்கு பணத்தை திருப்பி கொடுத்து விடுகிறேன் என்று ஒரு பாண்ட் பேப்பரில் கையெழுத்து போட்டு கொடுக்கிறார்.  இந்த விஷயம் நாக துர்காவின் தாய்க்கு தெரிந்து பவிஷை அசிங்கப் படுத்துகிறார்.  இதனால் வெறுப்படைந்த பவிஷிற்கு வேலையும் பறிபோய் விடுகிறது.  இந்த சமயத்தில் என்ன செய்வது என்று புரியாமல் தவித்த பவிஷ் துபாயில் பணிபுரிய செல்வதற்கு  முடிவு செய்கிறார். துபாய்க்கு சென்ற பவிஷ் இறுதியில் அவர் தன் காதலி நாகதுர்காவை திருமணம் செய்து கொண்டாரா? இல்லையா? என்பது தான் ‘லவ் ஓ லவ்’ படத்தின் மீதி கதை.

ரகுவரன் கதாபாத்திரத்தில் பவிஷ் நடித்திருக்கிறார். கதாநாயகனாக நடித்திருக்கும் பவிஷுக்கு இது இரண்டாவதுபடம் என்பதால்  இதில் மிக அழுத்தமான ஆழமான நடிப்பை வெளிப்படுத்தக் கூடிய கதாபாத்திரத்தை உணர்ந்து அனைவரும் ரசிக்கும் வகையில் நடித்திருக்கிறார். தனது கதாபாத்திரத்திற்கு தேவையான அப்பாவித்தனத்தையும் உணர்வுகளையும் இயல்பாக வெளிப்படுத்தி அசத்தியுள்ளார்.காதல் காட்சிகளில் மட்டுமல்ல சண்டைக் காட்சிகளிலும் சரியாகச் செய்து வரவேற்பு பெறுகிறார்.

பவிஷின் அதாவது ரகுவரனின் காதலி அவந்திகா பாத்திரத்தில் வருகிறார் நாக துர்கா. தெலுங்கிலிருந்து தமிழுக்கு கதாநாயகியாக இப்படம் மூலம் அறிமுகமாகியிருந்தாலும் தனது கடமையை செவ்வனே செய்து ரசிகர்களிடம் வரவேற்பு பெறுகிறார் நாகதுர்கா.

நாயகனின் தந்தையாக நடித்திருக்கும் கே.எஸ்.ரவிக்குமார்,அம்மாவாக நடித்திருக்கும் ஐஸ்வர்யா, நாயகியின் அம்மாவாக வரும் ரம்யா,காவல்துறை ஆய்வாளராக நடித்திருக்கும் செல்வராகவன், மகளிர் சங்கத் தலைவியாக நடித்திருக்கும் வனிதா விஜயகுமார் ஆகியோர் இந்த படத்திற்கு வலுவூட்டி நடித்திருக்கிறார்கள்.

இசை அமைப்பாளர் பாக்ஸன் இசையில் படத்தின் பாடல்கள் கேட்க   ரசிக்கும்படியாக உள்ளது மற்றும் பின்னணி இசையும் இனிமையாக உள்ளது.

ஒளிப்பதிவாளர் பி.ஜி.முத்தையா தனது ஒளிப்பதிவின் மூலம் காட்சிகளை இளமைக் கொண்டாட்டத்துடன் இளைஞர்கள் ரசிக்கும் விதத்தில் கலர்புல்லாக காட்சிப்படுத்தி கண்களுக்கு விருந்து படைத்திருக்கிறார்.

இப்படத்திற்கு கதை எழுதி இயக்கியிருக்கிறார் இயக்குநர் மகேஷ் ராஜேந்திரன்.  அதிக புதுமுகங்கள் கொண்ட இந்தப் படத்திற்கு வெற்றி தான் முக்கியம் என்பதை உணர்ந்து  வியாபார ரீதியிலான அனைத்து அம்சங்களையும் புகுத்தி எந்த சமரசமும் மேற்கொள்ளாமல் மிக சிறந்த முறையில் திரைக்கதையை உருவாக்கி இருக்கிறார். பல காலமாகத் தொடரும் காதல் மற்றும் ஆண் பெண் உறவுகளின் பல்வேறு பரிணாமங்களை மிக சிறப்பாக வெளிப்படுத்தி காதல் செய்யும் காதலர்களுக்கு  அதிகமாக பணத்தை செலவு செய்யாதீர்கள் என்பதை தெளிவாக சொல்லி வரவேற்பு பெறுகிறார் இயக்குனர்.

மொத்தத்தில், ‘லவ் ஓ லவ்’ இளைஞர்களும், காதலர்களும் பார்க்க வேண்டிய படம்.

ரேட்டிங் 3/5.

RADHAPANDIAN.